قعدتنا.

في حاجة بجد عايزة أقولها لك.

أنا عارفة إننا إخوات، وعارفة إننا بنتخانق وبنرخم على بعض وساعات ممكن أبقى مستفزة وإنتِ كمان مش سهلة خالص يعني.
بس وسط كل ده في حاجة عمرها ما كانت هزار: أنا فعلًا بحبك.

بحبك أكتر بكتير مما بعرف أقوله لك في وشك، وممكن أرخم عليكي وأهزر معاكي وأتخانق معاكي، بس ده عمره ما غيّر الحقيقة دي. إنتِ أختي. وإنتِ من أهم الناس في حياتي.

وعايزة أقولك حاجة يمكن أهم من كل الكلام ده: إنتِ مش محتاجة تبقي شخص تاني عشان تتحبي.

مش محتاجة تبقي أهدى، ولا أذكى، ولا أجمل، ولا أقل حساسية، ولا أكثر شبه أي حد.
إنتِ حلوة وإنتِ بوسي. بطريقتك، بشخصيتك، بعندك، بخناقاتك، بضحكتك، وبكل الحاجات اللي يمكن إنتِ نفسك مش بتحبيها فيكي.

وأتمنى جدًا إن اليوم ييجي اللي تشوفي نفسك شوية بالعين اللي أنا بشوفك بيها. لأنك لو شفتي نفسك بالطريقة دي، يمكن تعرفي قد إيه إنتِ تستاهلي تتحبي.

وأنا مش هقولك إن الدنيا عمرها ما هتوجعك، ولا إنك لازم تبقي قوية طول الوقت. بس هقولك إنك مش لوحدك.
وإنتِ مش عبء عليا. ومش لازم تعملي حاجة عشان تخليني أحبك.

إحنا ممكن نختلف. ممكن نتخانق. ممكن كل واحدة فينا تقفل على نفسها شوية.
وبعدين نرجع نقعد على سريرنا، نجيب حاجة ناكلها، ونشغل حاجة، ونكمل حياتنا.

لأن دي أختي.
ودي قعدتنا.
وأنا بحبك. بجد.